తిరుమలలో దేశీయ కళారూపాల సందడి.. 547 మంది కళాకారుల ప్రదర్శనలు

శ్రీవారి సాలకట్ల బ్రహ్మోత్సవాల్లో భాగంగా మూడో రోజైన గురువారం రాత్రి శ్రీ మలయప్పస్వామివారు ముత్యపుపందిరి వాహనంపై తిరుమాడ వీధుల్లో విహరిస్తూ భక్తులకు దర్శనమిచ్చారు.

వాహనసేవకు ముందు నిర్వహించిన సాంస్కృతిక కార్యక్రమాలు భక్తులను విశేషంగా ఆకట్టుకున్నాయి. 9 రాష్ట్రాలకు చెందిన 21 కళాబృందాల్లోని 547 మంది కళాకారులు తమ ప్రాంతాల సంప్రదాయ కళలు, నృత్యాలను ప్రదర్శించారు.

గుజరాత్ గర్బా, డాండియా ప్రత్యేక ఆకర్షణ

గుజరాత్‌కు చెందిన గర్బా, డాండియా నృత్యాలు ప్రత్యేక ఆకర్షణగా నిలిచాయి. కళాకారులు లయబద్ధమైన అడుగులతో, చప్పట్లతో గర్బా ప్రదర్శించగా.. డాండియా విన్యాసాలు భక్తులను అలరించాయి. గర్భదీపం చుట్టూ ప్రదర్శించే గర్బా నృత్యం సృష్టితత్వానికి ప్రతీకగా నిలిచింది.

హాలక్కి సుగ్గి కుణిత ఆకట్టుకుంది

కర్ణాటకకు చెందిన హాలక్కి సుగ్గి కుణిత కళారూపం కూడా ప్రత్యేకంగా ఆకట్టుకుంది. హాలక్కి వొక్కలిగ గిరిజన సమాజానికి చెందిన ఈ సంప్రదాయ నృత్యాన్ని పంటకోత పూర్తయిన ఆనందాన్ని వ్యక్తం చేస్తూ ప్రదర్శిస్తారు.

వైవిధ్యభరిత కళారూపాల ప్రదర్శన

తాళం నృత్యం, డ్రమ్ము విన్యాసాలు, ఒడిశా శ్రీ నృత్యం, కంజారా కోలాటం, బంజారా నృత్యం, తెలంగాణ బ్రతుకమ్మ నృత్యం తదితర సంప్రదాయ కళారూపాలు సాంస్కృతిక కార్యక్రమాలకు ప్రత్యేక శోభను తీసుకొచ్చాయి.

వివిధ రాష్ట్రాల కళారూపాలు ఒకే వేదికపై ప్రదర్శించడంతో తిరుమలలో భక్తి, సంస్కృతి, కళల సంగమం కనిపించింది. భక్తులకు ఆధ్యాత్మిక అనుభూతితో పాటు భారతీయ సంప్రదాయ కళల వైవిధ్యాన్ని ఆస్వాదించే అవకాశం లభించింది.