తిరుమల శ్రీవారికి నిత్య కైంకర్యాలు ఎలా జరుగుతాయి..?

కలియుగ వైకుంఠం తిరుమలలో... తెల్లవారుజామున శ్రీవారిని మేల్కొలిపే సుప్రభాతం నుంచి రాత్రి పవళింపు సేవ వరకు నిత్య కైంకర్యాలు ఎలా జరుగుతాయనేది ఇప్పుడు తెలుసుకుందామా..?

తెల్లవారుజామున 3:00 గంటలకు: 'కౌసల్యా సుప్రజారామ...' అంటూ సుప్రభాత సేవతో గర్భాలయ తలుపులు తెరుస్తారు. స్వామివారికి వెన్న నైవేద్యం సమర్పిస్తారు.

ఉదయం 3:30 నుండి 5:30 వరకు..ఆలయ శుద్ధి అనంతరం, పరిమళ భరిత పుష్పాలతో 'తోమాల సేవ' నిర్వహిస్తారు. ఆ తర్వాత 'కొలువు' దర్బార్‌లో నిన్నటి లెక్కలు, నేటి పంచాంగం స్వామికి వినిపించి, వెయ్యి నామాలతో 'సహస్ర నామార్చన' చేస్తారు.

ఉదయం 5:30 కి మొదటి ఘంట.. ఆలయ గంటలు మోగుతుండగా లడ్డూ, వడ, పాయసం లాంటి మహాప్రసాదాలను నివేదిస్తారు.

మధ్యాహ్నం 12:00 కి రెండో ఘంట... రెండోసారి గంట మ్రోగించి శుద్ధాన్నం, పులిహోరను దేవునికి సమర్పిస్తారు.

రాత్రి 7:00 గంటలకు..రాత్రి తోమాల సేవ, అష్టోత్తర శతనామార్చన, దద్దోజనం నైవేద్యం ఉంటాయి.

రాత్రి 11:30 కి ఏకాంత సేవ... అన్నమయ్య వంశీయుల లాలిపాటల నడుమ భోగ శ్రీనివాసమూర్తిని బంగారు ఊయలలో పవళింపజేస్తారు. రాత్రి వేళ బ్రహ్మదేవుడు వచ్చి పూజించడానికి వీలుగా గర్భాలయంలో మూడు వెండి గిన్నెల్లో పవిత్ర జలాలను ఉంచి తలుపులు మూసివేస్తారు. ఏడుకొండలవాడికి ఇలా రోజూ తిరుమలలో జరిగే ప్రతి నిమిషం ఒక పండగే, ప్రతి రోజూ ఒక బ్రహ్మోత్సవమే..!గోవిందా... గోవిందా...