కలియుగ వైకుంఠం.. తిరుమల శ్రీవారి గర్భాలయంలో ఇప్పటికీ వీడని అద్భుత రహస్యాలు..!

ఆంధ్రప్రదేశ్ లోని సప్తగిరులపై కొలువై, కోట్లాది మంది భక్తుల ఇలవేల్పుగా విరాజిల్లుతున్నారు శ్రీ వేంకటేశ్వర స్వామి. తిరుమల క్షేత్రం కేవలం భక్తిభావానికే కాదు, సైన్స్‌కు కూడా అందని ఎన్నో దివ్య రహస్యాలకు నిలయం. గర్భగుడిలో అడుగుపెట్టిన ప్రతి ఒక్కరికీ ఆధ్యాత్మిక అనుభూతిని పంచే స్వామివారి విగ్రహం చుట్టూ ఉన్న ఆ ఆశ్చర్యకరమైన విశేషాలు ఏమిటో ఇప్పుడు తెలుసుకుందాం..

తిరుమల ఆలయ గర్భాలయాన్ని నిరంతరం చల్లగా ఉంచినప్పటికీ, స్వామివారి మూలవిరాట్ ఉష్ణోగ్రత ఎప్పుడూ సాధారణం కంటే ఎక్కువే ఉంటుంది. ప్రతిరోజూ ఉదయం పూజల సమయంలో స్వామివారి విగ్రహంపై చెమట బిందువులు కనిపిస్తాయని అర్చకులు చెబుతుంటారు. ఒక పట్టు వస్త్రంతో ఆ చెమటను శుభ్రం చేయడం ఇక్కడి సాంప్రదాయం. ఒక రాతి విగ్రహం స్థిరమైన శారీరక ఉష్ణోగ్రతను ఎలా కలిగి ఉంటుందనేది ఇప్పటికీ ఎవరికీ అంతుచిక్కని రహస్యమే.

శ్రీవారి విగ్రహానికి సంబంధించి మరో అద్భుతమైన విషయం ఏమిటంటే, స్వామివారి వెనుక భాగంలో చెవి పెట్టి వింటే సముద్రపు అలల శబ్దం స్పష్టంగా వినిపిస్తుందని అంటారు. స్వామివారి నివాసమైన క్షీరసాగరం అంటే పాలకడలి నుంచే ఈ ధ్వని వస్తుందని భక్తుల నమ్మకం. అంతేకాదు, స్వామివారి శిరస్సుపై ఉన్న జుట్టు కృత్రిమమైనది కాదు, అది నిజమైన జుట్టు అని చెబుతారు.

పురాణ గాథ.. ఒకసారి స్వామివారి తలకు గాయమై జుట్టు ఊడిపోయినప్పుడు, నీలాదేవి అనే గంధర్వ యువరాణి తన జుట్టును స్వామివారికి సమర్పించిందట. ఆమె భక్తికి మెచ్చిన శ్రీహరి, ఆ జుట్టు తన శిరస్సుపై ఎప్పటికీ అలాగే ఉంటుందని వరమిచ్చారట.

సాధారణంగా పచ్చకర్పూరాన్ని ఏదైనా నల్లరాయికి లేదా శిలకు రాస్తే, కాలక్రమేణా ఆ రాయి చిట్లి పోతుంది. కానీ, తిరుమల స్వామివారి విగ్రహానికి నిత్యం అత్యంత శక్తివంతమైన పచ్చకర్పూరాన్ని పూస్తారు. అయినా కూడా ఆ దివ్య మంగళ స్వరూపం శతాబ్దాలుగా ఎలాంటి మార్పు లేకుండా, చెక్కుచెదరకుండా ప్రకాశిస్తూనే ఉండటం మరో విశేషం.

తిరుపతి బాలీజీ ఆలయం కేవలం ఒక పుణ్యక్షేత్రం మాత్రమే కాదు; భక్తికి, ఆధ్యాత్మిక శక్తికి ఒక సజీవ సాక్ష్యం. విగ్రహం నుండి వచ్చే చెమట, వినిపించే అలల శబ్దం, చెక్కుచెదరని శిల.. ఇవన్నీ భక్తులలో దైవచింతనను, అచంచలమైన విశ్వాసాన్ని నింపుతున్నాయి. అందుకే ఈ కలియుగ వైకుంఠం ప్రపంచంలోనే అత్యంత విశిష్టమైన, మహిమాన్వితమైన క్షేత్రంగా విరాజిల్లుతోంది.