శని జయంతి 2026: కర్మఫలదాత అనుగ్రహం కోసం.. ఏ రోజు..? ఎలా పూజించాలి..?

నవగ్రహాలలో కర్మఫలదాతగా, సాక్షాత్తు న్యాయమూర్తిగా కొలిచే శనిభగవానుడి జన్మదినమైన 'శని జయంతి'కి హైందవ సంప్రదాయంలో విశేష ప్రాధాన్యత ఉంది. సూర్యభగవానుడు, ఛాయాదేవి దంపతుల కుమారుడైన శనిదేవుడు జ్యేష్ఠ బహుళ అమావాస్య నాడు జన్మించారని పురాణాలు చెబుతున్నాయి. ఈ ఏడాది జూన్ 16న రానున్న ఈ పర్వదినాన్ని పురస్కరించుకుని దేశవ్యాప్తంగా ఉన్న శని క్షేత్రాలు భక్తుల రాక కోసం, ప్రత్యేక పూజా ఏర్పాట్ల కోసం సిద్ధమవుతున్నాయి.

​సాధారణంగా శనిదేవుడు అనగానే జనా బాహుళ్యంలో ఒక రకమైన భయాందోళనలు వ్యక్తమవుతుంటాయి. కానీ, శనిభగవానుడు కేవలం క్రమశిక్షణకు, న్యాయానికి ప్రతీక అని, సత్కర్మలు చేసేవారికి ఆయన ఎల్లప్పుడూ అండగా ఉంటారని వేద పండితులు స్పష్టం చేస్తున్నారు. ముఖ్యంగా జాతక చక్రంలో ఏలినాటి శని, అర్ధాష్టమ శని లేదా శని ధైయ్యా ప్రభావంతో మానసిక, ఆర్థిక ఇబ్బందులు ఎదుర్కొంటున్న వారు ఈ పవిత్ర రోజున స్వామివారిని ఆరాధించడం వల్ల ఆయా దోషాల తీవ్రత తగ్గి, ఉపశమనం లభిస్తుందని నమ్ముతారు.

​ఈ పర్వదినాన శనిదేవుని అనుగ్రహం కోసం భక్తులు ఉదయమే పవిత్ర స్నానాలు ఆచరించి విశిష్ట నియమాలు పాటిస్తారు. నల్ల నువ్వులను చిన్న మూటగా కట్టి, ప్రమిదలో ఉంచి, నువ్వుల నూనెతో శనిదేవుని సన్నిధిలో లేదా రావి చెట్టు కింద దీపారాధన చేయడం అత్యంత శుభప్రదంగా భావిస్తారు. స్వామివారికి ఎంతో ప్రీతికరమైన నీలి రంగు పుష్పాలు, జమ్మి పత్రితో పూజలు చేస్తూ, 'ఓం శం శనైశ్చరాయ నమః' అనే మూల మంత్రాన్ని జపించడం వల్ల జాతక దోషాలు తొలగిపోయి మానసిక ప్రశాంతత చేకూరుతుంది.

​శనిభగవానుడికి సమాజంలోని శ్రామికులు, పేదలు అంటే అత్యంత ప్రీతి పాత్రులు కావడం వల్ల ఈ రోజున చేసే దానధర్మాలకు విశేష ఫలితాలు ఉంటాయని శాస్త్రాలు చెబుతున్నాయి. శని జయంతి నాడు అవసరార్థులకు నల్లటి దుప్పట్లు, చెప్పులు, ఇనుప వస్తువులు లేదా అన్నదానం చేయడం వల్ల కర్మఫలదాత సంతోషిస్తారని ప్రతీతి. లోకంలో ఎవరినీ మోసం చేయకుండా, సత్య మార్గంలో నడుస్తూ, క్రమశిక్షణతో కూడిన జీవనాన్ని సాగించడమే శనిదేవునికి మనం ఇచ్చే నిజమైన పూజ అని ఆధ్యాత్మిక నిపుణులు గుర్తుచేస్తున్నారు.