అక్షయ తృతీయ రోజున ఇలాంటి దానాలు చేస్తే.. తరగని సిరిసంపదలు మీసొంతం..!

వైశాఖ శుక్ల పక్ష తదియ... 'అక్షయ తృతీయ'. పేరుకు తగ్గట్టే ఈ రోజున చేసే ఏ చిన్న శుభకార్యమైనా, దానధర్మమైనా అక్షయమై ఫలితాన్నిస్తుందని శాస్త్ర వచనం. లక్ష్మీనారాయణుల అనుగ్రహం కోసం, దారిద్ర్య నిర్మూలన కోసం ఈ పవిత్రమైన రోజున ఆచరించాల్సిన విశిష్ట దానాల విశేషాలు మీకోసం..

హిందూ ధర్మంలో అక్షయ తృతీయకు ఒక ప్రత్యేక స్థానం ఉంది. ఈ ఏడాది (ఏప్రిల్ 19వ తేదీ, 2026 నాడు వచ్చే ఈ పర్వదినం సంపదకు, శ్రేయస్సుకు మూలమని పండితులు చెబుతుంటారు. ముఖ్యంగా ఈ రోజున చేసే 'రహస్య దానాలు' జాతక దోషాలను తొలగించి, ఆర్థిక ఇబ్బందుల నుండి గట్టెక్కిస్తాయని నమ్ముతారు.

జల పాత్రలు అంటే ఉదకుంభ దానం : ఎండలు మండిపోయే ఈ కాలంలో దాహార్తిని తీర్చడం పరమ పుణ్యం. నీటితో నిండిన మట్టి కుండను లేదా కలశాన్ని దానం చేయడం వల్ల పితృదేవతలు శాంతిస్తారు. ఇది ఇంట్లోకి సానుకూల శక్తిని ఆహ్వానిస్తుంది.

ఆరోగ్య రీత్యా, ఆధ్యాత్మిక రీత్యా సత్తుపిండిని దానం చేయడం శ్రేష్ఠం. ఇది పేదరికాన్ని దూరం చేసి, వ్యాపార వృద్ధిని కలిగిస్తుంది.

వేసవి తాపం నుంచి ఉపశమనం కలిగించే విసనకర్రలను దానం చేయడం వల్ల లక్ష్మీదేవి ప్రసన్నమవుతుంది. వృత్తిలో ఉన్న ఆటంకాలు తొలగిపోతాయి.

బంగారం కొనలేని వారు శనగపప్పును దానం చేయవచ్చు. ఇది గురు గ్రహ అనుగ్రహాన్ని ప్రసాదించి, బంగారమంత పుణ్యఫలాన్ని ఇస్తుంది.

పేదలకు గొడుగు లేదా చెప్పులను దానం చేయడం వల్ల రాహు-కేతువుల దుష్ప్రభావాలు తగ్గి, ఆకస్మిక ప్రమాదాల నుండి రక్షణ లభిస్తుంది.

పాత్రమెరిగి దానం చేయాలి.. అది ఆడంబరంగా కాకుండా అంతరంగ శుద్ధితో ఉండాలి. గుప్త దానం అంటే.. కుడి చేయి చేసే దానం ఎడమ చేతికి తెలియకూడదు అంటారు. ప్రశంసల కోసం కాకుండా నిస్వార్థంగా చేసే దానమే అత్యంత శక్తివంతమైనది.

పూజలు, దానాలు చేయడానికి అక్షయతృతీయ రోజున వచ్చే అభూజ ముహూర్తం లేదా అభిజిత్ ముహూర్తం అత్యంత ఫలవంతమైన సమయం.అయిష్టంగా ఇచ్చే దానం ఫలితాన్నివ్వదు. కాబట్టి గ్రహీత పట్ల గౌరవంతో, సంతోషకరమైన మనసుతో దానం చేయాలి. పాడైపోయిన వస్తువులు లేదా మాంసాహార సంబంధిత వస్తువులను దానం చేయకూడదు. ఈ అక్షయ తృతీయ నాడు మీ శక్తి కొలది దానధర్మాలు చేసి, ఆ లక్ష్మీనారాయణుల కృపకు పాత్రులు అవ్వాలని పండితులు సూచిస్తున్నారు.