దేవఋషి నారద జయంతి రోజున ఇలా చేస్తే . సకల పాపాలు తొలగిపోతాయి..

విశ్వ కల్యాణ కారకుడు, పరమ విష్ణు భక్తుడు అయిన దేవఋషి నారద ముని జన్మించిన పవిత్ర దినమే నారద జయంతి. నిరంతరం 'నారాయణ.. నారాయణ..' అనే నామస్మరణతో ముల్లోకాలను చుట్టివచ్చే నారదుడు, భగవంతుడికి భక్తుడికి మధ్య వారధిగా నిలుస్తారు. ఈ ఏడాది మే 2వ తేదీన నారద జయంతిని జరుపుకోబోతున్నాం. ఈ పవిత్ర పర్వదినాన శ్రీమన్నారాయణుడిని పూజిస్తే కష్టాలు తొలగి, సకల శుభాలు కలుగుతాయని శాస్త్రాలు చెబుతున్నాయి.

జ్యేష్ఠ మాస కృష్ణ పక్ష ప్రతిపద తిథి మే 1వ తేదీ రాత్రి 10:52 గంటలకు ప్రారంభమై, మే 3వ తేదీ తెల్లవారుజామున 12:49 గంటలకు ముగుస్తుంది. ఉదయ తిథి ప్రాశస్త్యం మేరకు మే 2, 2026 (శనివారం) నాడు నారద జయంతిని నిర్వహించుకోవాలి.

బ్రహ్మ ముహూర్తం: ఉదయం 4:14 - 4:57
అభిజిత్ ముహూర్తం: ఉదయం 11:52 - మధ్యాహ్నం 12:45
గోధూళి ముహూర్తం: సాయంత్రం 6:56 - 7:17

నారద జయంతి నాడు భక్తులు సూర్యోదయానికి ముందే నిద్రలేచి కాలకృత్యాలు తీర్చుకోవాలి. శుభ్రమైన వస్త్రాలు ధరించి పూజా మందిరాన్ని అలంకరించుకోవాలి. నారద ముని ఇష్టదైవం శ్రీమహావిష్ణువు. అందుకే ఈ రోజున ముందుగా విష్ణుమూర్తిని షోడశోపచారాలతో పూజించాలి. విష్ణువును ధ్యానించిన తర్వాత దేవఋషి నారదుడిని స్మరిస్తూ పూజ చేయాలి.

స్వామివారికి చందనం, కుంకుమ, సుగంధ పుష్పాలను సమర్పించాలి. నెయ్యితో చేసిన హల్వా, పంచామృతం, తాజా పండ్లను నివేదించాలి. విష్ణుమూర్తికి సమర్పించే ఏ నైవేద్యంలోనైనా తులసి దళం తప్పనిసరి. తులసి లేని నైవేద్యాన్ని హరి స్వీకరించడని భక్తుల నమ్మకం. పూజానంతరం భక్తిశ్రద్ధలతో హారతి ఇచ్చి, నారాయణ నామస్మరణ చేయాలి.
నారద జయంతి రోజున...ఏ ఏ మంత్రాలను జపించడం వల్ల మానసిక ప్రశాంతత, కార్యసిద్ధి కలుగుతాయి అంటే..?
ఓం విష్ణవే నమః
ఓం నమో నారాయణాయ
ఓం నమో భగవతే వాసుదేవాయ

శాంతాకారం భుజంగశయనం పద్మనాభం సురేశం,
విశ్వాధారం గగనసదృశం మేఘవర్ణం శుభాంగమ్ |
లక్ష్మీకాంతం కమలనయనం యోగిభిర్ధ్యానగమ్యం,
వందే విష్ణుం భవభయహరం సర్వలోకైకనాథమ్ ||..