వైశాఖ కాలాష్టమిరోజున అప్పులు, బాధల నుండి విముక్తి కోసం ఈ పరిహారాలు పాటించండి!

ఇవాళ ఏప్రిల్ 10తేదీన వైశాఖ కాలాష్టమి. హైందవ సంప్రదాయంలో కాలభైరవ ఆరాధనకు ఈ రోజు ఎంతో విశేషమైనది. జ్యోతిష్య శాస్త్రం ప్రకారం, జాతకంలోని శని, రాహు దోషాల తీవ్రతను తగ్గించుకోవ డానికి, అప్పుల బాధల నుండి గట్టెక్కడానికి కాలాష్టమి నాడు చేసే పూజలు అద్భుత ఫలితాలను ఇస్తాయని పండితులు చెబుతున్నారు.

కష్టాల కడలి దాటించే భైరవ ఆరాధన..

వైదిక క్యాలెండర్ ప్రకారం ప్రతి నెలా కృష్ణ పక్ష అష్టమిని 'మాస కాలాష్టమి'గా జరుపుకుంటాం. ఈ శుక్రవారం నాటి వైశాఖ కాలాష్టమి గృహస్థులకు, సాధకులకు విశేష ఫలప్రదం. ముఖ్యంగా అర్ధరాత్రి వేళ (నిశిత ముహూర్తం) చేసే పూజకు ప్రత్యేక శక్తి ఉంటుంది. మీ జీవితంలో దీర్ఘకాలికంగా వేధిస్తున్న సమస్యల నుండి బయటపడాలంటే ఈ క్రింది పరిహారాలు పాటించి చూడండి:

పరిహారాలు-విశేష ఫలితాలు..

నల్ల కుక్కకు నైవేద్యం...

కాలభైరవుని వాహనం కుక్క. ఈ రోజున నల్ల కుక్కకు బెల్లంతో చేసిన రొట్టెను తినిపించడం వల్ల కాలభైరవుని అనుగ్రహం లభిస్తుంది. దీనివల్ల ఆర్థిక ఇబ్బందులు తొలగి, పనుల్లో ఆటంకాలు తొలగుతాయి.

చతుర్ముఖ దీపారాధన..

భైరవ ఆలయాన్ని సందర్శించి, ఆవాల నూనెతో నాలుగు ఒత్తుల దీపాన్ని వెలిగించాలి. నల్ల నువ్వులు, నల్ల పప్పు లేదా నల్లని వస్త్రాలను దానం చేయడం వల్ల శని దోషం నుంచి ఉపశమనం లభిస్తుంది.

ప్రతికూల శక్తి నివారణ..

ఇంట్లో నిత్యం గొడవలు, అనారోగ్య సమస్యలు వేధిస్తుంటే.. కాలభైరవునికి తీపి రొట్టెను (బెల్లం లేదా పంచదారతో చేసినది) నైవేద్యంగా సమర్పించండి. ఇది ఇంట్లోని ప్రతికూల శక్తిని హరించి, ప్రశాంతతను చేకూరుస్తుంది.

పూజా సమయంలో పాటించాల్సిన నియమాలు..

కాలభైరవుడు న్యాయాధిపతి,ఆగ్రహ స్వరూపుడు. అందుకే ఆయన పూజలో కొన్ని జాగ్రత్తలు తప్పనిసరి.. ముఖ్య గమనిక..పూజ చేసే రోజు మాంసాహారం, మద్యపానానికి దూరంగా ఉండాలి. జంతువులను, ముఖ్యంగా కుక్కలను ఎట్టి పరిస్థితుల్లోనూ హింసించకూడదు. బలహీనులను వేధించడం లేదా ఇతరులను అవమానించడం వంటి పనులు చేస్తే భైరవ అనుగ్రహం లభించదు. మనస్సును ప్రశాంతంగా ఉంచి, భక్తితో 'ఓం కాలభైరవాయ నమః' అనే మంత్రాన్ని జపించడం శ్రేయస్కరం. ఈ పవిత్ర కాలాష్టమి రోజున నియమ నిష్టలతో భైరవయ్యను పూజించి, మీ కష్టాల నుండి శాశ్వత విముక్తిని పొందండి.