దేశవ్యాప్తంగా దేవాలయాల బంగారాన్ని కేంద్ర ప్రభుత్వం స్వాధీనం చేసుకుంటుందనే వార్తలు సోషల్ మీడియాలో వైరల్ అవుతున్న నేపథ్యంలో కేంద్ర ప్రభుత్వం స్పష్టత ఇచ్చింది. గోల్డ్ మోనిటైజేషన్ స్కీమ్ (Gold Monetisation Scheme - GMS) కింద దేవాలయాల బంగారాన్ని బలవంతంగా తీసుకునే ఆలోచన ప్రభుత్వానికి లేదని కేంద్ర ఆర్థిక మంత్రిత్వ శాఖ వెల్లడించింది.
Read Also This:
ఒక టికెట్తో నాలుగు దర్శనాలు.. తిరుమల పవిత్రోత్సవం 2026 విశేషాలు
ప్రభుత్వం తెలిపిన వివరాల ప్రకారం, గోల్డ్ మోనిటైజేషన్ స్కీమ్ పూర్తిగా స్వచ్ఛంద పద్ధతిలో అమలవుతుంది. ఆలయాలు, ట్రస్టులు లేదా వ్యక్తులు తమ వద్ద ఉన్న నిరుపయోగ బంగారాన్ని బ్యాంకుల్లో డిపాజిట్ చేస్తే దానిపై వడ్డీ పొందే అవకాశం ఉంటుంది. అయితే ఇది పూర్తిగా వారి ఇష్టానుసారమే తప్ప ఎలాంటి బలవంతం ఉండదని స్పష్టం చేశారు.
ఇటీవల కొన్ని సోషల్ మీడియా పోస్టుల్లో “దేవాలయాల బంగారం కేంద్రం స్వాధీనం చేసుకోనుంది” అనే ప్రచారం జరగడంతో భక్తుల్లో ఆందోళన నెలకొంది. ఈ నేపథ్యంలో కేంద్ర ప్రభుత్వం అలాంటి వార్తలను పూర్తిగా అసత్యమని కొట్టిపారేసింది.
గోల్డ్ మోనిటైజేషన్ స్కీమ్ ద్వారా దేశంలో వినియోగంలో లేని బంగారాన్ని ఆర్థిక వ్యవస్థలోకి తీసుకురావడం ప్రధాన ఉద్దేశ్యమని అధికారులు తెలిపారు. ఈ పథకం ద్వారా దేశానికి బంగారం దిగుమతులపై ఆధారపడే పరిస్థితి తగ్గుతుందని ప్రభుత్వం భావిస్తోంది.